農曆新年其中一個指定動作當然係睇定流年運程，增強運勢啦！
除咗擺個風水陣之外，去旅行都有啲小貼示俾大家，齊齊吸盡各地靈氣，霉運去去，行運年年！
1. 鼠
2017年的老鼠仔有桃花運行，人緣運唔錯，如果係單身貴族就要把握機會啦。由於事業運都比較順遂，所以去旅行、公幹都可能有意外收獲，記得打醒十二分精神啦！
適合外遊目的地︰芭堤雅、夏威夷、新加坡
2. 牛
今年牛仔牛女有天解、唐符等等的吉星照住，所以全年大致順利，事業上更會有新機遇同發展。
但仍然難免會有是非同小人，有可能遇上官非，要慎言慎行，所以去短trip似乎更為適合。
適合外遊目的地︰台北、曼谷、東京
3. 虎
犯咗一年太歲似乎今年老虎們有望轉運！事業運勢會大逆轉，而且適逢今年驛馬星動，對於出門非常有利，特別係北方地區更有助力。但要注意健康方面會有水險，要盡量避免高空活動，去旅行免得過都唔好玩攀岩、跳傘啦！
適合外遊目的地︰俄羅斯、冰島、加拿大
4. 兔
原來兔同雞係萬年不合的組合，由於相沖，兼且有好多凶星跟住，今年屬兔的朋友仔要萬事小心啦。若果有投資、炒股就盡量以保守為主，想破財擋災就可以請家人、愛侶去旅行，洗開心錢不妨大方啲，增加正能量！
適合外遊目的地︰沖繩、首爾、巴黎
5. 龍
屬龍的人今年係大旺之年，真真正正係鯉躍「龍」門的時候，因為得吉星拱照同貴人相助，今年會機遇處處，有可能得到巨大回報。而且生肖與太歲相合，所以人緣交往都相對比較順利，適合同一大班朋友柴娃娃去旅行聯繫感情。
適合外遊目的地︰墾丁、清邁、大阪
6. 蛇
屬蛇今年運程平平，易有暗湧，要安守本份先可以平穩過渡。
但今年係合太歲之年，會有貴人扶持，仲得天廚神加持，可以盡情享受美食。建議可以去旅行大吃大喝，放鬆心情幫自己打打氣。
適合外遊目的地︰高雄、河內、悉尼
7. 馬
馬仔馬女今年算係整體各方都有上升運勢，特別財運非常強勁，有望升職加薪，連偏財運都會有所斬獲。雞年身體都算健健康康，但克太歲同凶星可能會影響家人的健康狀況，要細心留意一下，有時間就帶佢地出外走走。
適合外遊目的地︰三亞、濟州島、紐西蘭
8. 羊
羊羊今年表現不算出眾，工作上可能會有變動，或會覺得有少許吃力，算係默默耕耘的一年。而且羊羊今年會出現負面情緒，記得要適時釋放一下壓力，去旅行散散心，參與有興趣的活動都會好有效。
適合外遊目的地︰台中、蘇梅島、巴塞隆納
9. 猴
上一年屬猴撞正犯太歲，諸事不順，今年會大逆轉—好事連連。無論工作、感情、財運都會順利有好轉，唯獨要注意自身安全。
盡量避免去恐襲國家同埋玩高危活動，防止意外或者血光之災。
適合外遊目的地︰京都、丹麥、墨爾本
10. 雞
本命年會犯太歲是常識吧。無錯，今年屬雞的各位的確有好多難題，變動比較多。
工作、感情都會有衝擊同挑戰，要注意平衡心理狀態，盡量唔好同人爭吵，而且要保持心境開朗，可以去旅行多啲親近大自然放空一下。
適合外遊目的地︰雲南、馬爾代夫、瑞士
11. 狗
屬狗人士今年各方面運程都係一般，但桃花運相對比較好，會有好多機會識到新朋友，記得唔好錯過良緣啦！另外財運都會有少許進賬，可能會中到免費的旅遊獎，咁就可以梳乎啲豪遊一下。
適合外遊目的地︰杜拜、倫敦、地中海郵輪假期
12. 豬
今年豬仔豬女們有驛馬入命，需要重整旗鼓，多出外走動，而「孤辰」凶星亦會影響情緒，容易感覺孤單。
既然辛苦咗咁耐倒不如放自己一個悠長假期，試下去更遠的地方，會發現世界原來好大。
適合外遊目的地︰西藏、毛里裘斯、秘魯
