首爾遊明洞高性價比抵住推介

去首爾旅行為咗玩到盡，當然要揀早機去晚機返喇！不過晨早到步拖住件行李返酒店真係超麻煩，不過近年首爾同日本一樣都推出咗hands free travel服務，落機後即時將行李托運到酒店，自己就可以輕輕鬆鬆開始行程，食買玩hea夠先返酒店辦check-in，係咪好爽呢！

SAFEX的使用方法

透過網站及手機網頁(www.safex.kr)進行預約，提供韓文、英文、中文和日文介面。

前往仁川機場、首爾站、弘益大學入口站等服務中心進行托運。

托運及領取時間：仁川機場行李收件截止至下午三點 → 當天7點以後在飯店領取；飯店行李收件截止至早上9點 → 當天下午2點以後在仁川機場領取。

**托運客人姓名只須與酒店入住人姓名相同就可以，毋須再出示其他證明文件。

預約網站：http://www.safex.kr/

*依家做緊優惠，每件行李S/M/L每次只需￦10,000(~HK$70)

做好行李托運，第一站就可以隨心所欲啦！坐AREX普通車直達弘大，車支都只係￦2,000，車程大概50分鐘左右！坐普通車好處係班次密啲，價錢平啲，仲可以用T-money卡毋須獨立購票就可以上車啦！

响車唔覺意瞓著咗，瞓醒一陣就到咗弘大入口站喇！今日行程重點有三個，一係去幫襯人氣三文治店Egg Drop，二係去體驗韓式理髮，三就係向弘大行街shopping啦！

自從Isaac Toast走紅之後，近年韓國開多左好多類似三文治店，今次幫襯哩間Egg Drop，無論你只為打卡，亦係為食，佢地嘅出品都真係堅冇得輸！三文治選擇唔多，只得5-6款，不過對於觀光客嘅我，一個trip最多咪幫襯到2次，所以選擇唔多仲好起碼目標夠明確，唔怕撞正有選擇困難嘅朋友仔！價錢方面大概￦3,600 ~ ￦4,600不等。仲可以加錢￦500轉蒜蓉包、加蛋、或者加芝士！不過飲品方面就弱咗少少，建議行過兩間舖幫襯其他飲品店！另外，哩間店不設堂食，大家要有心理準備！

Egg Drop (弘大店)

地址：首爾市麻浦區弘益路 15 (서울시 마포구 홍익로 15)

營業時間：09:00 – 21:00

食飽飽去扮靚靚，今次揀咗响韓國好多分店嘅Juno Hair Salon，一號店响正Egg Drop旁邊座building，ABC Mart樓上！環境同香港Salon差唔多啦，個人認為其實都唔係咁需要預約，除非你有心水Stylist囉~ 收費方面，基本洗剪吹收￦30,000，￦45,000包造型設計，￦48,000包造型設計及少少護理(洗頭耐咗，多咗少少按摩同少少修護精華素…)。造型設計其實所有人都係推薦同一款髮型，就係今個夏天最流行嘅短髮微曲，即係朴信惠個新髮型。接受到短髮嘅朋友仔，應該都carry到，幾日裡面發現基本上由20歲到50歲好多都係哩個style，真係咩年紀都襯到。好厲害！

Juno Hair (弘大1號店)

地址：麻浦區弘益路17 (서울 마포구 홍익로 17)

時間：11:00~21:00