嚟到咁古色古鄉嘅金澤市，梗係要著番套正宗和服襯番下先得啦！
和服體驗都唔一定要女士們嘅專利，男士都可以著出個和味來~睇我就知啦~人字縫外套襯番個鮮黃格仔內膽，古典得嚟又不失時尚風！有興趣就知記得預約喇！
著到咁行梗係要出去行街街威威啦！哩條叫東茶屋街係金澤最富歷史嘅街道，有成二百年歷史~
著到咁行點都要豪番下！最土豪嘅做法就一於去食金啦！今日天氣咁好，仲有少少熱添，最啱食番杯雪糕抖抖涼！俾支黃金雪糕我呀！唔該！
唔係講笑架！各位觀眾金澤名物『金箔雪糕』，一杯900日元唔使！絕對豪得起啦！(食後感：金箔食唔出咩味，但係雪糕就勁重牛奶味，必食！)
古街就梗係有古商店啦，哩間志摩茶屋同樣有成200年歷史，仲要係日本唯一一間被列入庭國家重要文化財產的茶屋。
咪以為佢只係一間博物館呀，佢仍然係一間茶屋，想感受下古代日本嘅氛圍不防坐低飲杯茶食件和菓子啦！
志摩茶屋
地址：石川県金沢市東山一丁目13-21
營業時間：9:00～18:00
金澤買手信一定要嚟八百萬本店，店家係新開嘅，但係建築物裡裡外外都保留著200年前嘅模樣，店內所賣嘅商品全部都係金澤嘅最佳出品，由食品到家品都搵得到！
咪以為佢係威化餅，其實佢係即沖湯包先真，加水即變美味味噌湯！盛惠378日元
鍾意海膽嘅朋友哩款醬料一定唔可以錯過，用嚟撈飯、撈意粉、拌刺身食都得！地獄廚神都有救！
哩款蜂蜜真係有瘋架！唔係霆峰！係內有蜜蜂呀！大大隻標本浮向到，望落真係幾嚇人！或者大家當佢係鹹竹蜂咁諗，應該會好過啲嘅
八百萬本舖
地址：金澤市尾張町2-14-20
營業時間：10:00〜19:00(週三定休)
つづく
足本播送：
